Tamya Killakuna Manchachikuśhtin Allaykulunku

Suyupaq ćhawpin malkakunaka musya-musyaalla kayanku Lluqllakuna, yaku hunataykuna kaykunapis hukkunapis manchay talpuyta allaykulunku
Tamya Killakuna Manchachikuśhtin Allaykulunku

Tamya Killakuna Manchachikuśhtin Allaykulunku

19 de Diciembre del 2017 - 17:04 » Textos: Pedro Antonio Riccse Santos

Fenómeno de la Niña śhutiyuq chayaykayamun, llakiypaćha kanman Suyunchikpa, ćhawpinćhu malkakunaka, mana kallpanchaśhankunaćhu ñakayta allaykulunkuña.

DAÑUKUNA. Kanankama anchap wipyaśha malkakunaka Selva Central niśhanchikkunaćhuumi kayan. Pasco, Oxapampakunaćhu, mayu Cerveza huk camiunta apakun, wayuta paćhkaachin, carritirata tuñiychin, nunakunata llakiypaq wañuymanta ayqiśhtin chimpaachin.

Puerto Bermudezwan Ciudad Constituciónćhuñatak yaku pampaalun wasikunakta talpuykunakta.

Noviembrewan diciembre killakunaćhu, tamyakuna, waklikuna, luntukuna asakuna región Junin malkata llakiypaq wipyaalun, Lima malkap mikuyta apakaata. Villa Juninćhu, distrito Rio Tambućhu, Satipućhuuñatak, sistema eléctrico akchi puśhaakaapis limanakunapaq kaakunapis tuñikunku, ćhunka wasikuna palpuulunku, yaćhaywasip tihankunapis wichiilunku, kawsanap mikuykunapis ismuulunku.

WAÑUY. Pachitea provinciaćhu, Huanuco regionćhu, 12 martes muyunćhu, diciembre killaćhu, tawa wasikuna tuñiilunku, lluqlla wichiikalamuptin Pampamarka malkata ćhayanapaq carreterapis mana kanchu.

Centro de Operaciones de Emergencia nishakaa willakamun, wasi tuñiśhanćhu huk nuna wañuśhanta, Gregoria Tolentino Beteta (70) śhutiyuq, tawa nunakuna ishyaśhankunatapis willakamun.

Chaynallatak 19 nunakuna mana imayuq kamakalunku, 34 wasikunañatak llakiypaq, chaynullatak 5 wasikuna mana yaćhanapaqnuuña.

Colcabamba, Huancavelicaćhuñatak, huk wayqu domingo 10 muyunćhu achka wasikuna tuñityaaśha kamakalunku chaynuullatak nunakunapis mana wasiyuq kamakalunku. Ayacucho region mana hukaa malkakunaku llakilpis, Huamangaman Cangalluman kay killa allaykuyaptin luntu palpuykaa hala, akśhu, kinwa, awaśh, cibada tallayta pasaypa chinkaachin.